話說早前找來了KFC 鬆餅，也就是比士吉（Biscuit）的食譜，本來打算當下就著手試做。不過後來因為公私事兩忙，只好暫時打住。

直至近一個星期農曆新年假期有點空暇，加上自己又在書店買了一本教做麵包的書，於是便的起心肝買齊架生，蠢蠢欲動著手做這款西式包點。

（很作死地，麵包書內的英格蘭鬆餅食譜，竟又名為 Scone，死未！）

材料：
普通麵粉　　　　　　　　250 克
泡打粉 Baking Power 　1 又 1/2 湯匙
砂糖　　　　　　　　　　40 克
鹽　　　　　　　　　　　半茶匙
牛油（台灣稱奶油）　　　40 克
鮮奶　　　　　　　　　　150 豪升
雞蛋　　　　　　　　　　1 隻
蜜糖／楓糖漿　　　　　　少許

做法：
1. 先將麵粉及泡打粉篩過，加入砂糖及鹽拌勻
2. 牛油切粒後拌入麵粉堆內，用匙羹底把它們跟「顏」到同麵粉混合
3. 加入鮮奶，跟麵粉揉成麵團。
4. 放在室溫中發酵 15 分鐘。完成後麵團應該會比之前發大了一半
5. 把麵團分成 6 份，搓成球狀再稍為按扁
6. 在各麵團表面塗上薄薄一層蛋漿
7. 放進已預熱的焗爐內以攝氏 200 度烤 15 分鐘
8. 出爐後趁熱在表面塗上一層蜜糖或楓糖漿，再用 170 度加熱 1 分鐘即可

師傳教落的秘訣是步驟 3 加牛奶時要逐少逐少咁落，同埋加奶之後揉麵不要過份使勁，否則口感便不鬆化。其實佢講就易，做就真係唔易。我前後試左兩次，第一次學佢講逐少逐少咁落，第二次就一次過落。加奶如果逐少逐少咁加，係好難把麵粉完全溝勻，倒不如一次過倒晒落去好過。只要奶的份量唔好過量，就唔會太難搞。

另一個竅門是上糖漿後不要焗太耐，否則會有苦味。我就懷疑，肯肯雞的糖漿是沒有再焗過的 ...

基本成品的口感是及格有餘，可是在香味上仍然只肯肯雞的有點距離，無人地咁香 ... 到底係咩原因呢？係因為佢地用靚麵粉、靚牛油？（成日行過 Bread Papa 都聞到好香麵包味，有人跟我說過是因為用了上好的麵粉和牛油），還是加了香精？

我一定會解開這個謎團的！

伸延閱讀：
Kenturky Biscuit 肯德基鬆餅