『我隻 King 死得好慘呀！』
「都唔係丫，左右兩邊有我兩條「女」陪佢，名正言順一王二後，其實佢死得好好架喇！好多男人恨都恨唔到啊！」
『咦？又係喎！全靠你啦，令佢死得咁好睇！』
「放心喎，你肯同我捉棋，我一定會盡人事，幫佢搞得風風光光，好好睇睇架嘛！」

這幾天，迷上了國際象棋。

不論中國的「楚河漢界」，或是西方的「王后相騎城」，對現代人而言，「象棋」也是一門很花精神、很考腦筋、很奢侈的遊戲。可是，如果你是個喜歡運籌帷幄，做事愛看全局的人，大概很少會不喜歡這古老的遊戲。

一心喜歡跟別人對奕。對奕是一種思想上的交流和抗爭，能夠在棋局裡找到旗鼓相當的對手，是一件值得叫人欣喜的事。作為一個男性，如果能夠找來漂亮的女孩子對奕一局的話，更是一件賞心樂事。可以旗鼓相當的話，你更會讚美造物的偉大，感謝上帝仍有善心；讓世界仍存在著內外兼備的女人；而不是只剩下清一色空有外表的驅殼。

當然，我不否認，也許只這只是男人硬把自己想成是才子，才子理應配佳人的情結而已。

對上一次跟女孩子捉象棋捉個不亦樂乎，已經是大半年前。那時經常挑戰關小姐，捉中國象棋。直至近來，跟鉛鉛捉國際象棋，棋癮便一下子發作起來不可收拾，四出撩事鬥非不論男女通殺，逐一下戰書挑戰。

對國際象棋，一心大概仍處於門外漢階段。可是，基本操作仍是熟練的，也就苦了那些不太熟稔，勉強願意應酬我，卻其實不太熱衷的朋友。

辛苦大家了。

星期四晚找哥利對奕了一場，可是因為電腦虧虧地，中途斷線了，非常掃興。後來樹熊放工回來，硬拉著他跟我捉了兩盤中國象棋，首場險勝，次場險和。

我想我近來的心境大概是老了。也許有一天，會落街跟朗豪坊外的象棋阿伯對奕，廿蚊廿蚊的不斷交學費 ...

六點幾，從惡夢中驚醒。近來不知怎搞的，經常發惡夢。

一心的惡夢，全都很小兒科、很生活化。不會是遇見《28日後》的喪屍追趕，也不會是幽冥鬼界的牛鬼蛇神纏身；也許只是在夢中搞垮了一宗約會、被老細責難、被別人暗裡中傷之類而己。剛剛的惡夢，屬於前者；我夢見自己跟女孩子約會，到尾段時，竟無緣無故跟她失散了 ...

電話聯絡不上，留在原地也不是；四處尋找也不是。那種無助與茫然不知所措，到現在醒來仍是歷歷在目。

同類的夢、同一個對象，這星期以來做了三、四個。

對上一次，則是前晚，夢見自己被女孩發現自己不忠了。對方平淡地問責，我如實地承認。

女孩聽了之後，轉身深呼吸了幾口氣，然後還是轉過來，淡淡地跟我說：『我原諒你，不要再有下次了。』對於她表現出的那種寬宏和寬恕，我心裡只感到痛。那種因著對方的愛產生的內疚感帶來的痛，原來比死更難受。

拜託，這些生活演練已經太多，不論是是夢或是真實，最好也不要發生。我只想好好睡上一覺，發些好夢，不是奢求吧？！

情況著實令人關注。

想到這是甚麼飯嗎？奇怪的組合，你未吃過又或者未看下文，我包你絕對估不到！^_^

一心是個貪心且善變的人，這一點我從不否認。

很多時口裡說不在乎，其實甚麼也想留住；說這樣不好那樣不愛，其實甚麼也想得到。不論是在感情上，還是在飲食習慣上，也如是。

因此，很多時外出吃飯，我總是拿不定主意，不能馬上選擇想吃的食物。朋友們問我打算吃甚麼，我告訴了他們想吃燒味飯。到頭來侍應來了，我還是可能會瞬間改變初衷，選擇鐵板餐 ... 又或者，他們早早選好了要吃甚麼，我仍是拿不定主意，在海南雞飯、蒸魚餐或者肉醬意粉之間舉棋不定。甚至有些時候，侍應來了，我仍會在想今餐是否有更好的選擇，要侍應呆等我下一個，其實揀錯也沒啥大不了的決定 ...

就算是自己在家煮飯，有時也會因為這個緣故，買了太多的(食送)，煮出超過一個人份量的晚餐出來，自己一個人吃 ... 煩惱從來不是因為沒有選擇，而是選擇太多。

直至最近，給我找到一個可以「一次滿足三個願望」的地方。

說找到這個「地方」可能不太準確，因為這地方其實我早已知道，在那裡吃也吃了不下數十次。也許，應該說是在那個地方找到一款新的食品才對。

在旺角朗豪坊附近，有一間地舖茶餐廳，賣著一個很特別的焗飯。那焗飯的名堂叫：「咖哩洋蔥叉燒豬扒焗飯」。

它是一個雞蛋炒底的飯底，上面舖上平常我們在燒蠟檔見慣見熟的叉燒。然後，上面再覆蓋一個有洋蔥、最面層舖了椰絲的港式咖哩汁。最後，這個超奇怪的黃金組合，是以焗飯的形式在焗爐焗香，滾熱辣的端出來奉客的。所謂的叉燒豬扒，其實只是很厚切的叉燒而已。

怎樣，這樣的黃金配搭，夠搞野了吧？

可是它卻剛好滿足了一心有時同時想叫燒味飯、咖哩、焗飯三個願望，比出奇蛋更令人喜出望外。惟一美中不足的是，以一個唔跟餐飲的焗飯而言，賣四十大洋，絕對是偏貴啊 ...

一次滿足三個願望，始終是要多付一點代價就是了。

話說尋日，訓晏覺的時候，金金同小銀都走o左上o黎一齊訓。

點知兩隻貓貓又好似上到床又唔願訓咁，你眼望我望，用人類聽唔到的聲音在 Pillow Talk。咁鬼搞笑，一心當然影低佢啦。

「哈，金金你估我幾時會遇到白貓王子丫拿？」
「白花油王子就有你份～」


「咦？有狗仔隊偷拍呀！」
「喂，你影咩呀？你邊間報館架！？」

話說星期六上午，久未在 MSN 露面的舊同事 C 無情情俾o左個心理測驗我玩。她說是在網上找來，於是我根據謎面，找來那個測驗的最完整版本，放出來俾大家玩下。

謎面提示：
「日」字隨便加一筆劃，你腦裡最先想到哪兩個字？

然後，想一個身邊的朋友。

同樣，以「日」字隨便加一筆劃，你認為他 / 她會選哪兩個字？

想好了沒有？想好了便看答案吧。

這個測驗，如果你心裡沒有想著任何人來做的話，那便是對你自己的個性分析。如果你想著某個人的話，那分析的結果便是你心裡面對那個人的評價/印象。

旦 - 最懶的人

田 - 最好的人

目 - 最精明的人

由 - 最善的人

電（簡體的「電」字）- 最惡的人

舊（簡體的「舊」字）- 最毒的人

甲 - 最狠的人

申 - 最狡猾的人

白 - 對「性」好奇的人

巴 - 最刁鑽古怪的人

一心是又懶又好的人（有分先後次序的），簡單來說就是懶好人了。你呢？

炒椰菜，我想應該是世界上最易炒的菜，很難會炒得不好吃。

這個炒椰菜的 Recipe 就真係去食鐵板燒的時候，從日藉鐵板師傅身上偷師，然後回家自己改良的。有時真係唔抵得ｄ食肆，簡簡單單咁落ｄ鹽落ｄ雞粉炒個菜，就收你幾蚊以至廿幾蚊一碟，但有時出街食飯，唔食番碟菜心理上又硬係好似唔太健康。既然係咁，索性多ｄ自己在家煮，餐餐都炒下菜吧！街市買一個椰菜，都係 $5-10 以內，一、兩個人食，夠食兩餐了。


椰菜上碟之後，鑊內應該有少少汁同埋煮到變左白色的粒粒蒜蓉剩。把蒜蓉倒在椰菜上面俾客人睇到，賣相也靚ｄ。

日式鐵板燒的師傅炒椰菜是用牛油的。我嫌煩，用普通食油就算。香味差少少，不過好似健康ｄ掛？！

材料（1-2人）：
椰菜　　　　　　　　半個
蒜頭（切碎）　　　　兩瓣
雞粉　　　　　　　　半茶匙
鹽　　　　　　　　　1/3 茶匙
橄欖油　　　　　　　1 湯匙

做法：
1. 洗菜。洗菜前，先將半個椰菜用刀打橫一開兩，咁洗的時候會方便ｄ搣；而且食起上來也不會太大塊「一大住」。洗完搵個筲簊隔一隔ｄ水，如果唔係陣間就會勁彈油。
2. 切蒜頭。近來發現o左一個好有效的切蒜蓉方法，可以快手將蒜頭切成蒜蓉之餘，雙手也不會沾上太多蒜頭味。有機會再同大家詳細介紹下。
3. 燒熱鑊，轉中細火落油，之後就可以落蒜蓉。如果油出白煙就是熱過頭，要扭細火或者將個鑊離火一會先好落蒜蓉，如果唔係就會好易燶，炒出來ｄ菜就會有黑色一粒粒的燶蒜，賣相唔好睇。
4. 聞到蒜頭出左香味，就可以落菜。轉大火落菜，之後快手兜幾兜，等ｄ菜可以均勻地黐到ｄ油。當然，你慢慢兜都得，椰菜有足夠的水份，無咁易燶o既。
5. 炒到咁上下，應該睇到ｄ葉林左，ｄ桱就好似仲好硬咁。呢個時候，落雞粉同鹽，快手兜兩o野之後，蓋上鑊蓋。係喎，平時炒菜要落少少水先冚蓋，不過椰菜唔駛。佢大把水；你銀包同銀行加埋都無佢咁疊水就是了。
6. 在心裡面數廿秒，然後開蓋。儘量唔好俾鑊蓋的「倒汗水」滴落菜度，除非你鍾意炒完個菜水汪汪啦。再快手兜兩o野，搞掂，熄火上碟。

繼續講返今日煲碟。

一連煲三套片，感覺真係好鬼「一張戲飛全日任睇」 ... 雖然我未經歷過油麻地戲院果ｄ一日喪播七套「猛片」o既洗禮，不過咁煲法其實都真係蠡花精神。睇《日本沈沒》係為了看柴崎幸（你估真係因為日本特攝的特技咩！不過主題曲 Keep Holding U 真係幾好聽。）、睇《雙子神偷》就是為了睇吳京有幾好揪；睇《甜心粉絲王》就真係純粹見有碟就租、用來打發時間，無咩特別期待。

睇o《甜心粉絲王》果陣已經係下晝兩點幾三點。《甜》好似話係葛文輝首次執導。好老實講，年青人的那種感覺，佢都捉到o既，不過 A 碟前半段，關於人物個性的塑造與及劇情舖排，確實有ｄ悶，悶到我會行開行埋，入廚房繼續煮下o野食。

繼早餐整左個微波爐叮蛋後，我在睇《甜心粉絲王》期間，又分別炒左個菜，同埋整o左個珍寶腸肉眼扒跟意粉 w/ 蜜糖紹酒汁。如果「早餐 cross-over 午餐」叫 Brunch；咁唔知下晝三點幾整個「午餐 x 晚餐」可以叫咩呢？ Lunner？Luncher？:P


睇果兩條珍寶腸都睇得出：如果準備時間充份的話，一心係一定會在上面界花，展現下如《食神》裡周師父的「雕功」（一個"勻"字 :P）。

「珍寶腸肉眼扒跟意粉 w/ 蜜糖紹酒汁」個名好似好勁，其實無咩大不了。所謂「蜜糖紹酒汁」，完全係一心亂o黎o既。

其實原先早前特登買o左支幾十蚊的平平紅酒，打算煎牛扒的時候用來做汁。可是今次煮汁煮到一半時，落左意粉醬落鑊，才發現自己仲未開支紅酒。

即使轉得細火，搵得開酒器來，個汁都煮乾o左九世，仲未計太心急開酒，極有機會開爛個木塞（世事往往就會係咁）... 結果就係求其搵紹興酒同密糖溝意粉醬、黑椒香草生粉水（生粉水也落太多了，搞到個汁勁茶餐應Feel，杰撻撻...），整個汁出來算，出到o黎懶 Fushion 咁 ...

味道嗎？作為撈意粉的紅色醬汁還可以啦。可是很明顯，蜜糖的甜、紹興酒的香味，兩樣都跟牛扒唔夾囉 ... :P

其實我今次，重點只係複習如何煎好一塊肉眼牛扒o者 ...

之前有次煮飯，Des 講過，牛肉係唔可以用鹽醃的；如果唔係肉質會韌。於是我一直都好想知，煎牛扒時，鹽係幾時落的？

烹飪書話係臨煎之前在牛扒上灑上鹽同黑椒粉，於是我早幾日買左兩塊牛扒回來，當晚即刻煮左其中一塊，用烹飪書的方法。可能因為驚太鹹，輕手得滯，所以雖然成功煮到五成熟的牛扒出來，可是味道點嫌太淡了點。

今次，我嘗試在牛扒落鑊之後才灑上黑椒和鹽（有點似「日式鐵板師傅」的臨場處理方法）。這次牛扒味道 OK 了，只是可能手勢唔均勻，有部分位感覺鹹o左ｄ；另外就是火候同煎的時間似乎比上次猛o左/耐o左，於是出來的肉眼變了起碼有八成熟 ...

總之，對於牛扒的火候，以至牛扒的醬汁，一心都仲有好大的可進步空間。

食完o野，睇埋隻碟。吸o左個塵，跟住支力支力地訓o左個晏覺。六點幾起身再拖埋個地，一個大好o既星期日又接近尾聲。感覺雖然充實，不過依然係醃悶居多。

今朝因為發惡夢，七點幾就醒左。

既然起左身，決定開始煲碟。星期六放工又去o左租碟，租o左《日本沈沒》、《雙子神偷》同埋《甜心粉絲王》。三套裡面，有兩套是阿 Sa；再加埋星期五去左睇詹端文的《戲王之王》，其實睇佢都真係睇到有ｄ夠。不過呢，咁樣一連睇幾套，又發現阿 Sa 在《戲王之王》裡面的演技，係有好明顯o既進步。果然對住一大班好戲之人，點都會學到ｄo野。

早幾日在 Lindbergh 的 blog 內看到他的獨門碎/炒蛋 recipe，據說可以做出如 M 記早晨全餐一般的幼滑炒蛋。為食如一心之流，當然沒有不試的道理。於是，趁兩套戲中間的換碟空檔，入廚房做實驗。

完成品：

當然，我地呢ｄ視覺系o既，出來的賣相係靠攝影技巧搭夠啦。

可能我屋企個微波爐年紀大、機器壞，所以叮的時間要比較耐ｄ蛋先有變化。前後兩次入爐分別叮o左一分鐘，結果都滑，不過比自己心目中「老」o左少少。食完睇番 Lindbergh 的 blog 先留意到第二次唔駛咁耐，同埋自己打蛋果陣落漏o左牛油 ... 只好下次努力了。

至於實際來說好唔好食，我地好榮幸，請到美女試食員小銀百忙中前來偷食：

「Yum Yum，ｄ蛋都幾滑 ... 辣辣地o既？點解會有我唔食o既黑椒粉o架？心心，係咪你陰我！？」

在我返入廚房洗咁ｄ容器的時候，小銀已經好醒目咁自己跳左上檯偷食，叫都叫唔住。不過好彩，可能係因為落o左黑椒既關係，小銀俾黑椒辣親，食o左兩啖就伸住(月利)咁行開o左去飲水... :P

這個世界的人，可分成兩大類。

第一種是故事的消費者 Story Consumer。一般情況下，我們會視乎故事的長現方式，把這批人稱為讀者、觀眾、聽眾、圍觀的人 ... 諸如此類。理論上，故事的消費者能夠只看到故事最美好的部分，這是他們附出金錢、時間購買、入場、輪候以後，所換來應得的權利。

另一種人，是故事的提供者 Story Provider。有時，我們也把後者稱為說故事的人、作者、作家、寫手 ... 不一而定。說故事的人，花費了時間去訴說一個故事，則可從故事消費者的反應，得到認同肯定、讓自己進步的意見、滿足感、又或是單純只是一個自己解不開的問題的答案。

我的工作性質，令我擁有比較特別的身份。我處身於上述兩類人的中間，同時擁有兩類人的部分特質；也同時喪失了部分上述兩類人本應可以擁有的權利。因此嚴格而言，我同時是上述兩類人，又同時不屬於上述兩類人。

我本來可選擇輕戮地只成為第一類人，可是我又不甘心永遠被第二類人擺佈左右。想成為第二類人，卻發現原來他們付出的犧牲的，原來比誰都要多。懶精如我，能力不足之餘，我又不願努力。

於是，我只有維持原狀，繼續作為「故事」這東西由出生，直到它落葉歸根之前，一個小小的節點 Node。

我的名字，是一個小小的編輯。沒錯，特別強調：「小小的」。:P

編輯的其中一個日常工作，就是看書。

書看得多，才能養成畫龍點睛錦上添花、又或是醃尖聲悶雞蛋裡也可挑骨頭的眼界。看後動腦，才可以說出一個故事、又或是一個說故事的人技巧上的好壞。

於是今日，又做讀書報告。

這次看的，是高泳文的《醫院有鬼 2》。

這本書分成兩個故事：第一個是一宗醫院內發生的情殺案，故事有少少爛尾之嫌；另一個故事乃雙線發展。主線是醫生的女友目擊事故死者的故事，副線是曾墮胎少女因心魔入院，在醫院內遇上另一隻好鬼的故事。

初初開始看的時候，感覺是不錯的。第一個故事的開頭佈局不錯，以護士的角度描述醫院內發生的一宗事故，最後護士駭然發現，原來自己已經死了，很有西片《鬼眼》的味道。第二章開始 POV 回到真正的幾個主角身上：跟死者有交集的女醫生，與及將會成為女醫生男友的警探。

死者的靈魂要求女醫生協助找出兇手報仇，有點老套的橋段。以鬼故以言，可接受；反正人鬼之間的互動，來來去去就不外就是那幾種關係。有時，你想新潮也是新潮不來的。

女鬼初出現時，在醫生房及車止嚇人的情節，氣氛和安排其實已營造得很不錯，可是就是欠了那麼一點點力度，嚇不著人。也許是女鬼不停重複那一句：「醫生，我死得好慘啊！」產生了不應出現的喜劇效果，令人想發笑？

定還是，其實是我看了聽了太多，膽子變得大了？

到故事的前中段，開始出現後勁不繼、寫唔得長的情況。999 誰是兇手也實在是太快呼之欲出。太快估到往後的劇情，失去了看懸疑恐怖故事原應有的趣味。

第二個故事也有相似的問題。墮胎少女可能真是被鬼嬰纏身，亦可能只是心魔作祟。反正看得出她是副線，只是讓故事好作收尾之用，根本不必太深究。倒是她在加護病房陽台上，經常遇上鄰房的病友這個安排，我看第二次的時候（揭盅前 8 頁），便已估到那是鬼了。最後兩條線會合而為一，也是中途因為一個關鍵字露了餡，有點無癮。

不過，又或者是因為一書兩故事，篇幅較短，難以故佈疑陣，才會出現這種到喉唔到肺的估到劇情吧？！Overall 這本書的故事節奏也是明快的，不錯的了。

尚可以的金句：
「一個經常和死神交手的醫生，絕不會喜歡聽到那個鬼字。因為不管世上有沒有這類物體，也意味著又失去了一條生命，如果生命在他的手裡消失，那也就是他又輸了一仗。」

雖然根據語意而言，上中下三段的意思根本就駁唔埋，不過整體感覺夠正面，也令讀者更能感受醫護人員那份敬業、重視生命的心理。至於金句的長度嗎？75 字才一個句號 ... 明明可以在「失去一條生命」後分句的 ... 編輯大概是睇漏眼了吧。

繼續昨天未完的意粉專題。

對一心來說，意粉根據同醬汁的關係，可以分成五大類：

1. 睇落無汁的意粉（e.g. Pizza Hut 的香蒜肉絲意粉）
2. 汁料淋在表面的意粉（e.g. 肉醬意粉）
3. 汁料同意粉兜均的意粉（e.g. Spaghetti House 的海鮮墨魚汁意粉）
4. 汁料兜均之餘仲要入焗爐的意粉（e.g. Puzza Hut 焗白汁海鮮寬條麵）
5. 湯意粉（e.g. 金寶罐頭湯建議食法，或茶餐廳供應的叉燒湯意 etc.）

我地平常食的白汁意粉，一般都屬於 2 至 4 呢三個類別是但一個；當中又以 3 同 4 最常見。唔知點解，白汁意粉真係好少將個汁淋o係面 ... 不過呢個問題我唔深究啦，呢篇文主要講白汁。

鬼佬整西餐，醬汁的基本公式是：
露 Roux + 湯 Soup = 淋醬 Sauce

白汁o既主要材料，包括上湯（通常是雞湯或魚湯）、鮮忌廉（台灣書叫「鮮奶油」）、香草、調味料，同埋「露 Roux」。露 Roux 其實有ｄ似我地中國人煮飯時落的「生粉水」，都係有整傑個汁的功效。當中差別只係，我地中國人係差不多煮完煮好，先落生粉水「埋獻」；外國人的露就是一開始煮汁的時候落，同埋個汁一齊煮的。

露 Roux 的基本構成材料，是牛奶、牛油同埋麵粉三樣o野。做法是用細火將牛油融化，待牛油滾起起泡泡之後，加入篩過的麵粉，用細火兜均就完成露。據說露放雪櫃冰格，可以保存 2 星期至 1 個月。用的時候，加熱，再隨隨加入適量牛奶及／或上湯稀釋至一定濃度，就成為我地平時見慣見熟的白汁。茶餐廳廚房，會稱呼露為「麵撈」。用o既材料亦有少少唔同；通常佢地都係用豬油來炒麵粉。

以前未搬出來住之前，我試過跟上述配方在家整白汁。臨床實驗話俾我知：搵來搞 ...

首先，篩麵粉之後，加入滾起的牛油果下原來唔易，好易會搞到ｄ麵粉一舊舊。其次，用牛油炒出o黎的露並唔係白色，係黃黃地色。如果火候控制得唔好，炒過左火，就會再黃ｄ，到時就一定唔叫白汁，要叫黃汁 ... 茶餐廳用豬油，豬油本身係白色，麵粉又白色，所以出到黎的麵撈只要唔過火，自然也是白色，不過豬油高膽固醇唔健康大家都知。倒不如炒起左ｄ配料之後，加湯加奶加 Cream 加生粉水無咁嬲！:P

其實鬼佬都有整到差不多時落生粉水的習慣。當然佢地唔叫生粉水，佢地果隻叫 Beurre Manie。Beurre Manie 的材料也是用牛油同麵粉好似打蛋咁打均成 Cream 狀，煮汁煮到差不多埋尾時落，增加汁的濃度。咁你話，平時我地中國人的廚房，Beurre Manie 易搞ｄ定生粉水易搞ｄ？唔駛我講你都知。

理論上，湯的部分也應該講究。如果煮海鮮，咁就應該用魚湯或海鮮湯；煮肉類（多數是白肉），就用雞湯。不過，雞湯都仲話有現成的史雲生；無端白事屋企又邊會有魚高湯？唔通真係特登買ｄ蝦蟹魚貝類回來煮湯咩？！所以，一心的白汁，多數都係用雞湯就算，有時仲係粒粒雞精 Chicken Stock 加水，你估史雲生真係平咩！

好喇，唔吹水，講做法，以白汁蜆肉意粉為例。

白汁的材料：
急凍蜆肉　　　　　　　10 粒（多ｄ都得，視乎你食幾多）
蒜蓉（切碎）　　　　　2 瓣
洋蔥（切方丁）　　　　1/4 個
橄欖油　　　　　　　　1 湯匙
雞湯　　　　　　　　　一杯（200cc）
牛奶　　　　　　　　　半杯（100cc）
白酒　　　　　　　　　2 湯匙
香草　　　　　　　　　適量
生粉　　　　　　　　　2 湯匙（唔一定落曬）
淥意粉水　　　　　　　適量
水　　　　　　　　　　適量

急凍蜆肉可以在凍肉舖買到，一盒盒的，通常 $20 一盒，有好多，幾乎夠煮三人份的蜆肉意粉。買回來之後，如果佢有結冰就要等佢解凍（或用微波爐解凍都 OK）。

牛奶也可以改為 50cc 奶，與及另外準備 50cc Cream。不過我多數嫌麻煩，買一盒 Cream 回來又未必可以短時間用曬，所以多數都剩係用奶唔用 Cream。

做法：
1. 一心習慣係淥完意粉後，留起少少淥意粉的水（搵個碗載起之類）。然後用番淥意粉個易潔窩來煮汁。先用中火燒熱個兜，等裡面殘留的水份燒乾，加入橄欖油，轉細火（又或把個煲暫時離火），落蒜蓉兜均起鑊，讓蒜蓉釋出香味。
2. 然後把洋蔥（及其他蔬菜，如有的話）落鑊。轉回中火炒，目的是要把蔬菜炒香炒林炒出味來。如果是那些難熟、不會釋出水份的蔬菜（根莖類），可加入少少淥意粉水，蓋上窩蓋一會，用蒸氣焗一焗林佢地。（留意小心乾水，乾水就會燶！）蔬菜林左就加埋蜆肉，太早落蜆肉會變無味同埋韌
3. 加入香草、雞湯及白酒，轉猛火煮滾。滾起之後，加入牛奶，再等佢滾。呢個時間，開定生粉水（2 湯匙生粉 + 3 湯匙開水）。
4. 見牛奶滾起，加適量鹽及胡椒粉調味，最緊要試味，唔係通常你都會後悔。味道 OK 之後，逐少逐少加入生粉水，一邊加一邊攪，見濃度合心意就收手。
5. 將之前淥好的意粉倒入窩內，馬上熄火。趁汁料的餘溫，兜均意粉同汁，儘快把意粉上碟，唔好留在窩內，唔係意粉就會過林的了。
6. 如果汁多得滯，倒左佢。如果唔係，太多汁浸住，賣相唔好睇。
7. 如果打算加芝士面，加生粉水時加多少少，做傑ｄ個汁。上左碟之後舖上芝士、芝士粉，放入預熱了的焗爐叮到佢芝士融、有少少焦。總之，記住要入焗爐的白汁要做傑身少少。（一心家無焗爐，此部分是依書直說。）

備註：
1. 上述提到其他蔬菜，最常見的是加埋青椒、紅椒等。
2. 香草，可選用超市（多數是百 X 才有）有得賣一樽樽的混合香草，又或者自己買幾支回來自己配搭。羅勒（Basil）、百里香（Thyme）、鼠尾草（Sage）合稱香草三寶，混合起來是百搭。如果是做茄汁系的醬汁，用月桂葉（Bay Leave）就無死錯人。不過記得一滾起就要將 Bay Leave 撈起，唔係會產生苦味。現時一心廚房主流的是 Basil 、奧蘭多（Oregano）同埋迷伕香（Rosemary），做白汁只會落前兩項。

參考資料：
醬汁料理百匯（台灣東販、萬里書店 2001 年 4 月初版）
150 道西式醬料（台灣楊桃文化 2003 年 5 月初版）

應川的要求，整理了一下淥意大利粉的方法放上來。

因為係為了同廚房有仇的川而設，所以我會盡量詳細把自己的心得、步驟逐一寫下，難免有點太長氣，太「侵」。本身對烹飪有研究的朋友，請先有此心理準備。

首先講下點煮意粉。

我地在家整意粉食o既，通常都係指乾意粉；即係超市可以買到的那些一包包o既百德阿姨呀、實惠牌呀果類。基本上不論是意粉 Spaghetti、扁意 Linguine、蝴蝶粉 Farfalle/Farfarone、長通粉 Penne，以至平常到不得了的通心粉，總之係小麥製的，一心都把它們歸類在意粉類別，其煮法大都是相通的。

據一心的分類法，寬條麵 Lasagne 和天使麵 Capellini 當然都係意粉，只是對初煮意粉的人而言難度較高，所以今次唔講。

題外話，有乾o既意粉係咪會有濕既意粉呀？呢位同學問。

問得好。答案當然係有啦，而且我地自己在家都可以整到添，基本材料就係蛋、低筋麵粉同埋鹽。如果係一人份量，約是 100 克低筋麵粉加兩隻雞蛋，鹽適量。攪拌均之後壓扁，切絲。搓果陣佢會變乾身，咁你就要用力ｄ搓番林佢，千祈千祈咪加水！唔係就會一鑊泡。手造意粉的方法，我係睇書睇返o黎o既，無做過臨床實驗。我咁懶，當然係買現成架啦，仲自己搓？咪傻啦！

好，返入正題。開始煮意粉之前，首先講份量。

坊間 LOG ON、SOGO 之類百貨店咪有果ｄ好 Q 貴既量意粉圈圈（學名是「意粉尺」）賣o既？其實唔駛買o既，聽我講落去啦！其實平時一個人份量的一碟意粉，未煮之前大約係 90-100 克左右。

咁咪要用廚磅量囉？買個廚磅咪仲貴過買「好 Q 貴量意粉圈圈」？

你又打斷我啦，都話唔駛買咯！宜家我地買包裝意粉，一包通常都係 1 磅，即係 454 克。即係話，一包乾意粉大約係 4-5 碟既份量。於是，你如果打算煮一個人普通一碟份量的話，取成包意粉的 1/4 至 1/5 就巖喇。咁即係幾多呀？你又問。如果用食指同姆指圍個圈圈，大約係一個伍毫子至一個一蚊銀之間咁多啦。明無？

但係平o既意粉尺同埋廚磅其實日本城同埋 JUSCO 十蚊店都有得賣喎？你又話。駁嘴駁舌你就叻！10 蚊唔係錢呀宜家？俾我當交學費好過啦，俾我o既話唔該開畫線票，抬頭寫「香港宣明會」、「無國界醫生」之類，是但放落一間銀行的票箱，我會收到o架喇！

扯得太遠喇，都仲未開始煲水添 ... 返去正題。

揀一個大小合適的煲。一心慣常用 18cm 直徑易潔窩，貪佢方便洗，也可以用來煮汁之類。根據坊間教整意粉書所講，一人份的意粉應該用一公升水來煮o既。一心從來無理呢個建議，我通常都係求其在水喉裝 1/3 至半兜咁高的水。又係時候複習下小學學過的圓柱體公式喇。

高度 x 半徑 x 半徑 x PI = 圓柱體積
約 4 ~ 5cm x 9cm x 9cm x 3.14 = 1017cc ~ 1272cc（差唔多啦！）

於是誤打誤撞地，係一公升喎（我都係宜家先留意到 ^_^）！煲滾水之後，加 1 茶匙鹽同埋適量的橄欖油落窩攪均。鹽同橄欖油並唔係為了調味，而係為左意粉煮既時候唔會「黐埋一住」。如果無橄欖油，其實一般食油（花生油、粟米油）都得，係無o左橄欖油果種香味o者，影響唔大。煲意粉的水就準備好了，之後便是落意粉。

果時睇動畫《天才小廚師》味吉陽一第二、三集教o既：以握拳的方式握著意粉（意粉垂直），把拳頭移到窩子正上方中央，放手，等意粉「篤篤篤篤篤」咁跌落窩內。咁ｄ意粉就會好靚咁呈同心圓咁散開。當浸在水中個尾慢慢林身的時候，乾o既部分佢就會慢慢跟住冼埋入窩。呢個時候先至攪佢幾下，等佢地散ｄ唔好群得太埋就 OK o架喇。

時間的掌握方面。一般包裝袋都會有提示。建議是：唔好跟佢，永遠都減佢一至兩分鐘。即係如果佢話係要煮 8 分鐘，咁就煮 6-7 分鐘（此計法只適用於長身意粉，不適用於天使麵、蛋麵及闊麵）。意大利人煮意粉，講求咬感，意大利文叫 Al Dente。

前一陣子大快活賣唔知肉醬意粉定唔知意肉意粉的電視廣告時，有條短髮索女走出來同阿澤一齊大叫咩「Oral 釘田」、「Oral 釘田」的，其實就是說 al dente 這個意大利文。當然，我唔識意大利文，佢地講得巖唔巖、正唔正宗我唔知。總之煮包裝乾意粉要做到 al dente，一定唔可以跟佢講個時間來煮，跟佢一定會林曬。

當然，唔同既爐具火力唔同。所以最好的方法，就是煮少佢 1-2 分鐘之餘，再o係差不多完成時，夾少少上來咬一口試下，未得就再煮一陣再夾起再試。如果咬開之後發現外表林身，中間有頭髮絲咁幼細的一個白色芯係硬身要用牙o趙先 OK o既話，恭喜，你成功做到 al dente 了，熄火撈起啦。

喂！個芯好硬喎，你話。唔駛驚，因為離火之後，意粉自己的餘溫都仲會改變意粉的質地，仲有就係你加個有溫度o既汁落去果陣，佢又會再熱一次改變質地。當然，如果你真係唔介意係咪 al dente，總之要食軟身o既，咪煮耐少少囉，我當然唔會阻止你啦。^_^

離火之後，如果你會攤一陣先搞個汁，唔係即刻將意粉同汁結合的話，可以俾一茶匙橄欖油撈一撈個意粉，阻止意粉表面的水份揮發，色澤也會靚ｄ。

作死，寫左千幾字先講完個點淥煮粉添；似乎我真係太長氣喇 ... 只好留番下一篇先講白汁啦。

參考資料：吃義大利麵的第一本書（台灣茉莉出版，1998年10月初版）

端午節。無鬼聊聊既一日假期。

在家磨下磨下，不覺就到下午五點幾六點。樹熊今晚約左佢既 170 姐姐夜晚去街街。我見反正在家無所事事，又好似好耐無入過廚房，決定今晚下廚煮餐好o既俾自己食。

平常我都會諗好煮咩，上網睇曬 Recipe 列曬清單，先至去街市買(食送)。今日決定聽天由命，落到街市先算，到時睇下邊樣新鮮買咩，懶係「不時不食」扮曬大廚。

去到花園街旺角街市，經過魚檔。大蜆賣緊 16 蚊一斤（上幾個月賣緊 $20 / 斤），仲識噴水勁新鮮喎，於是問魚佬要左一斤。『斤半好無呀？』魚佬又用呢招屈你買多ｄ，「是但啦。」反正唔係多好多，要埋。

買得蜆，一心通常都係整清酒煮蜆，通常都會買少少絲瓜一齊煮無咁寡。去到菜檔，ｄ白色既茄子又好似好新鮮咁喎，於是又要左兩隻。當時根本無諗過買來點煮 ... 之後在想，不如買免治肉整意式肉丸啦？去到肉檔，發現可能因為太遲落去，肉檔已差唔多收曬，剩係得番一兩檔仲做緊生意；牛肉檔更係收緊，無牛肉賣 ...

其實ｄ意大利人如果整家常菜，無牛肉買應該都會用豬肉既o者？！是但啦，咁又買左 10 蚊免治豬肉。好，基本材料齊備，打道回府。

於是，今晚的菜單訂好了。如下：

1. 蒸白茄瓜配蛋黃醬（冷前菜）
2. 絲瓜清酒煮蜆
3. 意式肉丸（偷工減料版）配意大利粉
4. 梅子豆漿蒸蛋白（甜品）

其實，原先梅子豆漿蒸蛋白並唔係甜品來的，加上蒸的時候保鮮紙封得唔夠緊，入左水起 ... 因此嚴格來說，呢一餐係有少少失敗，俾個蒸蛋白拉低左總分 ... :P

．梅子豆漿蒸蛋白
材料：
蛋白　　　3 個
無糖豆漿　100cc
甜話梅　　1 粒
冬菇　　　3 片（裝飾）
糖、鹽　　適量

做法：
1. 甜話梅用水沖掉表層的鹹醱梅粉。再用 20cc 溫水浸泡半小時備用。
2. 蛋白打勻，加入豆漿及浸梅水打勻，避免起泡（我失敗了，結果蒸出來的表面像泡沫白奶咖啡 ...）。加入適量的糖及鹽調味（這次我半均放了一茶匙糖、半茶匙鹽，結果糖味太出，變甜點了。其實半匙糖半匙鹽應該就可以）。
3. 用篩子過濾一次，倒進一寬口杯子或盤子中。
4. 把話梅及冬菇片放蛋白液上作裝飾，在杯口 / 盤口封上保鮮紙。
5. 放進鑊內隔水蒸 10 分鐘。蒸了 5 分鐘左右開一開鑊蓋，散一散水氣再蒸。

．蒸白茄瓜配蛋黃醬
材料：
白色細溫室茄瓜　2 隻
蛋黃　　　　　　1 隻
糖　　　　　　　1 茶匙
鹽　　　　　　　1 茶匙
橄欖油　　　　　1 茶匙
白醋　　　　　　1 茶匙

做法：
1. 白色茄瓜洗淨去頭尾，批去部分表皮後一開二，分成四段。
2. 置於淺碟中，灑上少許鹽，隔水蒸熟，待涼備用。
3. 蛋黃、糖、鹽、橄欖油、白醋混合打勻成蛋黃汁，淋在蒸熟的茄子上，完成。

其實正宗的蛋黃醬不是這個樣子的，要傑身得多，而且不加醋。要傑身的其中一個方法是加 Cream。不過加忌廉的醬汁好似唔係好巖夏天食。天氣又咁鬼熱，做個酸酸甜甜的汁把它當涼伴菜也不錯。

好了，重頭戲來了。

為甚麼我會說這個意式肉丸是「偷工減料版」呢？其實，我在臨入廚房做菜之前，還是上網偷看了別人做意式肉丸的方法（我真的是姣婆守唔到寡 ...）。嚴格來說，意式肉丸的處理方式，跟上次我做漢堡扒的材料以至方法非常相似。於是我索性把那方法照辦煮碗一次結果出來的效果也不差就是。

理論上，做肉丸除了肉（牛加豬）外，還要有半個洋蔥。我無買洋蔥，家中也沒有存貨，於是改為落幾粒蒜頭（切碎），效果一樣好。

．意式肉丸（偷工減料版）配意大利粉
材料：
免治豬肉（半肥瘦）　　　$10 蚊
蒜頭（切碎，唔駛好碎）　3 - 4 瓣
蛋黃　　　　　　　　　　2 個
橄欖油　　　　　1 茶匙
鮮奶　　　　　　　　　　100cc
麵包糠　　　　　　　　　1/4 杯至 1/2 杯
黑椒　　　　　　　　　　適量
鹽　　　　　　　　　　　適量
香草（Basil、Oregano）　適量
水　　　　　　　　　　　100cc
白酒　　　　　　　　　　30cc
意粉（墊底用）　　　　　1/3 碟份量（約 30 克左右）

醬汁：
蕃茄意粉醬　　　　　　　2 湯匙
淥意粉水　　　　　　　　適量
香草　　　　　　　　　　適量
黑椒　　　　　　　　　　適量

做法：
1. 在煲內加水，煮沸後加 2 茶匙橄欖油及 2 茶匙鹽。把意粉煮熟，撈起瀝乾，加入 1 茶匙橄欖油拌勻備用。淥過意粉的水留起少少備用。
2. 免治豬肉加入蛋黃、切碎的蒜頭、橄欖油、黑椒、香草拌勻。加入鮮奶拌勻，然後一邊攪拌一邊加入麵包糠，直至豬肉看來成膠狀，表面不再因為鮮奶而「濕淋淋」。加入適量的鹽調味（我加了 1 茶匙，感覺上剛剛好），拌勻，放在一旁待上 10 - 15 分鐘備用。
3. 把肉醬用匙羹分成肉丸狀（一心很懶，只粗略分做四個大大的。其實 10 蚊免治豬肉，可以分 6-8 個大小適中的）。在平底鑊燒熱油，冒白煙後轉中火。把肉丸放到鑊中煎香表面，不時用筷子翻動。
4. 待表面煎香轉色，加入 100cc 水及 30cc 白酒，蓋上鑊蓋燜熟。
5. 用叉或筷子篤下肉丸。如果有汁液流出即已熟。把肉丸拷起，放在墊有意粉的淺碟子上備用。
6. 把鑊內的剩汁加熱，加入淥意粉水、蕃茄意粉醬、香草、黑椒，猛火煮至收乾一半時調味，淋在肉丸上，即成。


肉丸切開後 Texture，睇得出有幾鬆化。

由於淥意粉水本身有鹽，因此調味時不要太重手，否則會過鹹（我這次就是因為忽略了，所以鹹左少少）。

Overall 今晚呢餐都 OK，尤其是蜆真係超大隻超甜超新鮮。（有罐裝汽水的直徑咁大隻！）

又來了，又來了，鉛鉛又來了，tAg bLoG 沒完沒了，哈。

在沒有任何先兆之下，被鉛鉛愛得罕見突襲，要接這個「唉曾關」。討論最先是由半桶水的上踢任的兩位女性朋友發起的，難怪整個所謂「愛情觀」的導向感覺上都是現代女性找結婚對象的觀點為出發點。

某次跟公司同事出去食飯時，也聽過隔離檯的女食客有類似論調。大意是現今女人揀男人，首重 ABCDE 五個條件，分別就是：

Appearence 外觀
Body / Build 身裁 / 體型
Career 事業
Dollar 錢（很實際）
Education 教育程度

這次 bLoG tAg 的題目則是：

1. 學歷（事業）
2. 性格
3. 各項價值觀
4. 過往的經歷
5. 家境

或者是因為「他 / 她有幾愛妳 / 你」是客觀不來，計算不了；因此在談這個愛情觀的時候，上述五個 Point 沒有一個是談論「有幾愛」，全都只是外在條件。

把愛情物化，可是一件很悲哀的事 ... 除非上述條件的不足，都可以用「愛」來抵消（e.g. 因為我愛佢佢愛我，so 即使佢未達我標準，我唔合佢要求，我地雙方都唔 mind）的話，咁我諗上述的愛情觀才是真的有意義。

不過，我也真的見過很多兩人條件相差頗遠，卻勉強走在一起不快樂的情況（自己的父母基本上也是這一類）。所以，我想條件還是要有的，不過這條件不是「死」的就可以。

tAg 開始：

1. 學歷（事業）：
學歷和事業其實應該分兩部分來說。

．學歷
我想，學歷的嚴重差距對兩人戀愛 / 婚後生活的影響會大一點，尤其是當其中一方仍停在極低水平。學歷的重點不只是集中在學知識方面，而是也應該在學做人的態度上。

試想想一個是小學畢業，另一個是大學畢業（思想層面的發展差了六至十年！），大家對世界的闡釋層次、對人生的態度也會很不同吧？！意見的交流，很多時都會因為眼界問題而產生衝突，這是可以預視的事情。

當然這只是一個 extreme case。能夠同 Level 當然最好，不過農夫都話「愛要黎到既時候邊個都無辦法」，世事往往無咁完美。如果一個是中學 / 預科，另一個是大學學位 / Master，我想其實也可以，分歧不算太大。反而各人停在邊個程度不是重點；兩人會否循著相同方向行緊？

例如大家都積極向上進修，咁兩人方向一致，即使身處不同層次，思想都仍會在交集，而且也能互相推動前進。如果學歷高的一位 keep 住進修，低的那個不思進取，到頭來兩人還是會越走越遠。

．事業
兩人收入高低差距等我覺得不是太重要。學鉛鉛話齋，盡力而為就可以了。不過我會補充另一點，就是最好兩人都在自己在行的層面發揮所長，同埋可以在工作上獲得成功感。

年中聽埋聽埋唔少老公出面工作受氣，回家搵老婆出氣的新聞。我諗即使 EQ 幾高既人，在社會上生存總會面對工作壓力。壓力有時是上司俾的，有時是客俾的，有時是自己俾自己的。揀一份配偶認同你，而你自己又可以在當中獲得成功感的工作，自然可以把壓力變成動力，推動自己工作更上一層樓，而不是三不五時就發人脾四。

2. 性格：
我想，性格上的要求只要能夠互相尊重與及互相遷就、忍讓就可以了。始終兩個人是不同的個體，個性上就一定有分歧。如何接納分歧、求同存異，追求平等尊重的個性是不可或缺的。

大部分所謂「愛情專家」對性格配對的意見，可歸納為「物以類聚」及「互補長短」兩大類。一心相信，緣份是會令人物以類聚，可是走在一起之後，便要互補長短。

別以為一開始找個「互補長短」的對象可以把自己的生活品味 / 質素提升。我試過了，那是對雙方來說，都是很痛苦的經歷。戀愛不是填鴨式教育。

3. 各項價值觀：
價值觀在雙方關係上的確很重要。

舉個例，如果對方鍾意食o野，願意花好多錢同時間在食這方面。可是你係對食好求其是但o既人，寧願餐餐都係 10 分鐘八達通麥記搞掂；覺得食百幾蚊一餐都嫌貴同花時間o既話，肯定會火星撞地球，有排你地愁。

講到尾，都係睇兩人追求怎樣的生活，把甚麼放在生活的甚麼位置而已。

4. 過往的經歷：
這個我覺得影響不大，只要兩人一起的時候是「自由身 / 自由心」，不受過往的經歷綑綁著（例如心裡仍愛著某個人、仲未同前妻離婚、同之前男友分左手仍拖拖拉拉之類），就夠了。

5. 家境：
基本上「門當戶對」不會是要求，不過就一定是 Bonus。成長的環境一定會影響一個人的性格和價值觀（甚至影響學歷）。既然以上各項都不宜相差太遠，那兩人的家境當然也不宜南猿北轍。

好多女人都想釣金龜嫁有錢仔；好多男人心裡底也渴望娶個富豪千金咬老軟。人望高處，此乃人之常情。只是當中要面對的壓力（不論是來自家人、對方的家人、自己、親朋戚友、社會輿論），唔係個個知啦。

「你信唔信都好，我真係好鍾意我老公架。我都費事同人講，講左都無人信啦。ｄ人實會話架，『車！有幾愛丫，識果七日！愛咪愛佢ｄ錢！』就算把口話信ｄ人呀，個心都系咁諗架啦，『車！有幾愛o者，識果七日！愛咪愛佢ｄ錢！』有時連我自己都問我自己：『車！有幾愛o者，識果七日！愛咪愛佢ｄ錢！使唔使咁牽腸掛肚呀…使唔使咁牽腸掛肚呀…』」
──節錄自 Sammi @《我左眼見到鬼》

我突然諗起呢段劇情。很感人的情節，打算釣金龜、娶千金的朋友們，你們有信心你們的愛有這種程度嗎？

端午節下午，拉拉雜雜的胡言亂語寫了一大篇，我決定唔踢人喇。大家有緣路過，又有興致發表接踢就自己o黎啦。

話說看了川的他們眼中的......一文，發現原來不只我一個想不起川最深刻的話。忽發奇想，如果是我身邊的朋友接這個 tAg，他們又會記得我那些 Punchline 呢？

如果問 Dicky，我想他一定會說是《一心第二定律》。

曾是 IT 行業出身的一心，當然有幾句經典的 IT Punchline，可以隨時拿出來耍寶。身邊朋友最耳熟能詳的，一定是找我幫手整電腦時，我最常用來妖言惑眾的《一心三定律 The 3 Principles of Ichikokoro》。當中的「一心第二定律」，更是被 Dicky 奉為經典，三不五時談到電腦、電子消費產品話題，就會掛在口邊。

．一心第一定律
「所有o野都會壞。」
（朋友們在考慮買 XXX 前最常問的：『邊隻牌子無咁易壞呀？』，又或者我幫佢地整電腦時，佢地問我：『點解佢會壞o架？』我便會答：「所有o野都會壞。」）

．一心第二定律
「所有壞o既o野都係由好o既o野黎。」
（用來回應朋友們在維修期間最愛問的：『佢尋日仲好地地o架喎？！』我便會答：「所有壞o既o野都係由好o既o野o黎。」好駛好用，不用再多作解釋；反正解o左，對方又未必明 ...）

．一心第三定律
「有ｄ壞o既o野，一開始就係壞o架喇。」
（用來回應朋友們在維修期間最愛問的：『我買o左個幾星期咋喎？都無咩點用過！』我便會答：「有ｄo野，一開始就係壞o架喇。」）

如果是阿唐的話，我想我對他講得最多的，應該是：「你自己諗清諗楚啦！」

如果是樹熊，印象最深的應該是：「有食唔食，罪大惡極」吧？！

如果是姚記，我想會是「姚師父」，在我們一班朋輩中，是我最早這樣稱呼他。

如果是 Des 的話，我就不太肯定對他來說，最深刻是哪句。倒是我對他說過，最深刻的，是某次談到買單鏡相機「一闊三大」時，我曾跟他說過：「如果做唔到果個效果，咪唔好勉強囉！」之類。

愛姐說深刻是那次我跟她說的那個聽回來的酒店鬼故 ... 其實那次也是我第一次咁認真咁講鬼故俾人聽。不過鬼故應該算不上是深刻的 Punchline 吧？！

如果是公司同事，見我某天下晝唔出去食 Lunch，又唔買外賣，我最常就會說這句：「三餐夾埋一餐食，慳水又慳力。」

如果是近來用三點色泳裝與及陽光與海灘引誘我一齊去游水的那些朋友（如樹熊的甄小姐 / 樹熊的 170 姐姐等），我應她們的是這句：「陽光與海灘都是我的天敵。」

至於其他朋友，我就真的想不起來了。跟你們相處的時候，我想我不論是在清醒或唔清醒的情況下，都說了太多言不及義的無聊話。就像是網上的討論區洗板咁，一時間我自己也無法想起那些是有聊的。或者你們想到的話，不妨轉過來告訴我好了。

細個果陣，每晚新聞報導之後，有一個約只有一分鐘的電視節目，叫《每日一字》，主持人是林佐瀚先生。

《每日一字》的開場動畫，是一個乒乓球在每日一字四字上彈跳而過，配合著音樂那段沒歌詞沒甚起伏的「凳凳燉鄧．凳凳燉鄧．凳凳燉鄧．凳！」

然後，林佐瀚先生每晚的開場白總是：「今日要同大家講個ｘ字...」風趣幽默地瞇眼笑面，生動的表情加上正字 / 錯字的字幕解說，令人受益良多。我想，自己對語文的興趣，部分可能也受到他的影響。

小時候總愛學著他鏗鏘的語調，把每日一字的內容變成每日一粗口字：「今日我要同大家講個『屌』字...」事實上，林佐瀚先生流暢而且字正腔圓的對白不太易學。他講對白，彷彿好像不用透氣似的！如果你在句字中間偶有停頓，「今日，我要同大家講個『屌』字...」那便不再是林佐瀚，而是尋找他鄉的鍾 Sir 了。

反而現在的《最緊要正字》，我一集都沒有看過。雖然，身邊不少朋友跟我說女主持 Jess 都幾索，搭住 Suki 兩女一男有一定可觀性 ... 夾唔巖時間收看是原因之一、習慣不看本港的免費電視頻道也是原因，不過，我想主因是總認為貽興黃沒有那種林佐瀚、利嘉兒《笑談普通話》般的主持魅力。

講樣超無公德心的白癡野俾大家聽。

以前那些公園仔休憩地，咪有ｄ別人用塗改液寫甚麼「到此一油」、「愛你一生一細」、「撲佳冚家橙」、「XXX鹹濕吾著富」之類的塗鴉既？一心細個的時候，試過勁無聊地，也拿著一支塗改液，把別人的錯別字圈起指正。有時，一天在一個公園內，可發現三十至五十個這些錯別字，收穫非常豐富 ...

如果圈出一個錯別字值一蚊，那麼圈一日，可以夠兩個月內一日食一支孖條的了。

當時一心的想法是：反正到市政局要派人清潔、上漆的時候，多個圈多個字少個叉少個字又有咩分別呢？！可是如果有人認真細看公園內的留言，一心的所作所為絕對有助大家修正常犯的錯別字。幾咁理直氣壯，現在回想起來，真的是超厚顏超無聊是也 ...

不過，也可能因為咁，在我生命中埋下伏線，做左宜家做緊的工作。

今日，在公司執執下稿受到啟發，想同大家講個下「疚」同「咎」呢兩個字。（←又變了鍾景輝 Tone... :P）

「疚」同「咎」這兩個字有無分別呢？

原來，「疚」的意思是指「內心的不安、後悔慚愧」；而「咎」名詞是解作「過失」的意思（作動詞解作「責備、責罰」）。至於「究」作名詞則是「原因」，作動詞是「深入探查」的意思。

於是，形容一個人做了一件事後悔不已，「內疚」才是正確的寫法，寫成「內咎」就是寫了別字。

而在成語「難辭其Ｘ」中，我地就應該用「難辭其咎」，也就是難以推諉那個過失的意思。同理，「引Ｘ辭職」也應該是「引咎辭職」，因為犯錯而請辭。

習題：
1. a) 動輒得疚　b) 動輒得咎　c) 動輒得究
2. a) 疚由自取　b) 咎由自取　c) 究由自取
3. a) 既往不究　b) 既往不疚　c) 既往不咎

（P.S. 第 2、3 兩題我覺得真係有難度，我的 Hint 係此成語以廣東話說就是「自己(手羅)o黎衰」與及「當粉筆字抹o左佢」。）

近來，經常百無聊賴（又或者明明忙到九彩也）到 Youtube 打片釘。

今日想到大家分享兩條片，一條是許茹芸的好聽 MV，歌名也叫《好聽》。MV 把許茹芸拍得白白的好靚；看她瞇著眼笑的時候，總讓我想起某位朋友。

許茹芸 - 好聽
 

另一條片是在 Surfing 時在 Dennis 的 Blog 內看到的，是一條很感人的音樂 + 文字動畫。我在公司吞 Pop 觀看時，看看下居然忍不住眼淚，喊左出黎 ... 我想老細同同事仔 SY 應該唔知我原來咁眼淺吧？！

我是小白　小新的朋友
 

好想馬上回家擁著金金和小銀 ...

我就知道，「出得黎行，遲早要還」，或曰：「tAg 人者，人亦 tAg 其（地）頭」。在《大隻佬》裡，就叫做揮之不去的「業 Karam」... 點都好，呢個世界，有好多呢類永遠不變既真理，係避都避唔到既 ...

早排接了鉛鉛的 tAg 了之後，踢了川。結果現在，報應來了。:P

1. 點你的人是誰？
川。
如果在 James Bond 片集裡出現，他也許會跟你說：
『My name is 川, 老川.』

2. 你跟他是甚麼關係？
朋友，MSN 經常打牙較的對象；瞭解香港出版、本地小說創作市場的一道橋。

3. 寫出你對她的 5 個好印象。
i)  「快」。套用 Mario Kart Arcade GP 2 內遊戲評述的那句：「Fast, he's too fast!!!」
ii) 「肯」。肯聽人講o野，仲會俾到你好多啟發的意見。
iii)「準」。準時，大部分情況下，約親佢幾乎總是有早無遲，遲都唔會遲好多。:P
iv) 有拼勁，不斷主動爭取機會。
v)  堅持堅持，佢知道幾錢一茶匙。

4. 他對你做過最深刻的事...？
...真係諗唔起喎...

5. 他跟你說過最深刻的說話？
...真係諗唔起喎...

6. 如果他變成你的情人...你會因為他的那一方面令你喜歡他呢？
嗯...不敢想像...我想是永不放棄的個性吧?!...還是不敢想像...

7. 如果他變成你的敵人...你會因為他的哪一方面令你討厭他？
即係呢...敵人唔一定會討厭架喎；可能只係因為立場唔同、投身既勢力不同...如果係我諗會係因為錯別字、的的了了得唔得？

8. 現在你想他對你做的一件事？
搵日請食飯。

9. 你覺得周圍的人認為你是怎樣的人？
養貓好有心得的人（實情當然無咩心得可言，係我兩隻貓照顧我日常生活就真）。

10. 自己想成為的理想類型是？
無o既，公司上市啦，每年股東分紅分番十個八個俾我咁囉。住西貢三層式洋房，底下有地窖做酒窖果隻，仲有三四個車位，有三四部車（BMW / Ben 跑、Porsche、Smart4Four、掃把佬之類）咁囉。有專人打理我後花園個溫室同埋私人泳池啦，定時定候溫室有士多啤梨、有機車厘蕃茄之類的收成啦；逢週末或週日搞下比堅尼派對囉。
或者做老闆啦，有自己的連鎖式舖頭，賣玩具啦、賣衫啦之類，好似 I.T. 咁既規模就心滿意足架喇。
或者英雄啦，可以改變呢個世界既人啦。
或者普通人啦，招牌跌落街會砸死幾十個，但係會有幾千萬保險賠果種啦。

11. 給關心自己的人大喊一句吧！
「大家唔駛理我，俾我發下夢得架喇。」
You may say that I'm a dreamer, but I'm not the only one.

12. 把這份問題傳給你最想知道的他 / 她　對你的感覺的 10 個人。
打死我都只係會搵女仔接架喇，我唔想再發生「假如川變成我的情人」這種事，哈哈。

1) 鉛鉛，你第一個走唔甩（雖然我同你無理由有可能，but I 甩 U 哈哈～）
2) +0 姐（雖然我都知同你無理由有可能，哈哈～）
3) 愛姐（雖然知呢個題目你應該會覺得無聊...唔接無所謂 :P）
4) Dicky 啦（雖然佢係男的，不過我 OK 既～如果朱古力姐姐唔 Mind 的話，呵呵～）
5) 阿唐啦（雖然佢係男的，不過我 OK 既～如果你老婆唔 Mind 的話，呵呵～）
6) Twinbee（幫下手，有時間就接啦，Thanks.）
7) Fu（幫下手，有時間就接啦，Thanks.）
8) 薰姐（幫下手，有時間就接啦，Thanks.）
9) 諗唔到，後補。
10) 諗唔到，後補。

星期二，趁仍未落畫，跟桃桃去了看《單身部落》。

沒想到李彩華可以演得咁放，對她的印象有點改觀。陳輝虹果然係好好笑，佢演的那個澳洲回來的未婚中年男人實在是非常正，跟谷祖琳產生了很多火花！最正是谷祖琳失聲之後，他們兩人的電話對話：

（以下內容含劇透）

Don = 陳輝虹
Vi = 谷祖琳

Don：喂？係？
Vi：（失聲）...
Don：你 ... 唔舒服呀？
Vi：（失聲，卻拚命點頭）...
Don：（靠估）... 喉嚨唔舒服？
Vi：（失聲，用力點頭，用手比出姆指讚揚）...
Don：拿，唔緊要，咁你陣間發條短訊俾你個地址我，我買ｄ野上黎你食啦！

我覺得係好彩先估中囉。不過，戀愛o既o野，就係要靠一點運氣才會開始o既。

另一段笑爆全場的是 Woody（曾國祥）如何誘騙 Kit（李彩華）的初夜。不過我留意到笑的大多是男生，女生可能對此共鳴不大吧 ...

Woody = 曾國祥
Kit = 李彩華

（話說兩人都是第一次，Woody 因緊張而早洩。難得有第二次機會，Kit 又性意缺缺 ...）
Kit：我俾左一次機會你喇，係你自己唔好好珍惜咋。唔搞喇，我要訓覺。
Woody：OK，齋攬，唔搞。
（Woody 佯裝乖乖睡覺，擁著 Kit 不消一會又開始毛手毛腳，把手伸詮 Kit 的睡衣裡。）
Kit：E ... 你係度做咩呀！
Woody：無野，齋摸，唔搞。
（Kit 抱怨了幾句，沒有強烈阻止。Woody 得寸進尺，被中的他似乎已脫掉褲子。）
Kit：E ... 你做咩呀...
Woody：齋擺門口，齋擺門口。
（Kit 抱怨了幾句，沒有強烈阻止。Woody 繼續得寸進尺。）
Kit：E ... 你想點呀...
Woody：齋入去唔郁，齋入去唔郁。
Kit：E ... 好痛呀 ... 你又話唔郁！

Overall 是一齣有鹽花的笑片。影評說的 7.5 分我認為是偏高了，以一齣消閒喜劇而言，叫稍為高於合格啦。

不過在眾多演員中，似乎也只有李彩華同陳輝虹兩人較耀眼而已。連凱的耍帥，唔知點解今次不太帥；原本我都仲覺得董敏莉靚的，拍出來卻唔係咁靚（包左好多，暫且更不要說她的演技）；細 JOE 同黃浩然呢就中規中矩 ... 配角方面，反而演李彩華同曾國祥之間第三者的陳苑淇都幾搶眼。

隱隱感覺到導演有訊息想帶給觀眾的（應該是那句甚麼「女人自己的幸福（性 / 愛），就是要靠自己爭取」之類吧），可是就是有點眼高手低、到喉唔到肺之類。

透過三位女演員以個別向觀眾以大頭獨白方式說出來的說教手法，其實已經很落伍了吧 ... 而且，這種半婦解式的論調，配合了三個女演員的與男人糾纏際遇，反而令我覺得成個戲的故事走向很男性主導。所謂鼓吹女性獨立、性開放，最後咪又係益左我地男人，等我地（假設我地係成日去蒲的男性）容易ｄ搵食。細 JOE 那條故事線是唯一一條唔係咁諗的線（由勁濫交變返做專情專性），不過最後的結局卻又展現女人仍是要獻媚（將錯就錯，扮曬自己仍是純情女孩）以滿足男性大男人心理 ...

我想起《大丈夫2》。沒有真正細看過，不過鼓吹的是類似的主題（女人唔滾，男人唔緊，都係女性要自主之類）。不知道比較起來，邊個講的女性心態會中ｄ？

成個戲最獨立的那個女性，一定係安雅。職業女強人的形象，可是角色安排佢係女同性戀，仲溝埋董敏莉添，似乎也有把獨立女性的身份角色扭曲之嫌 ...

不過最後果度，安雅明明悉破董敏莉對她不忠，仍沒有拆穿呢一點，我諗可能就係點解會有女人寧願揀女人都唔揀男人的其中一個重點：女人似乎較懂得以對方的角度出發看待一個問題、看待雙方的關係。換了是男人發現女友偷偷同前度約會，嘿嘿 ... 我想沒幾多個男人會啞忍 ...

有時我會覺得，男人同女人既然是兩種不同的生物（一種來自火星，另一種來自金星），兩者要互相瞭解，當然係俾同性與同性的互相理解難。我不反對（也不鼓吹）同性的愛情，但總認為同性愛情是一種捨難取易的「讓賽」：寧願犧牲了繁衍後代的關係功能，以換取一條較平坦的感情道路。因為這種關係會對以「家庭」及「人口」為單位的傳統社會結構產生破壞性的長遠影響，所以同性戀很難被社會普遍支持，只能接納不能同意 ...

這套戲也有野可以俾男人學的。

話說，李彩華同連凱在連凱的店內的一輪激情後，連凱送李彩華搭的士。李彩華上左車，車門才剛剛關上，連凱即截停的士司機，跟他說：「唔去司徒拔道喇，我唔捨得俾佢走！」轉向 Rain：「妳今晚留o係度啦，好無？」

OK Num 喎我覺得 ...

上次同薰姐講開別人是非，就提過這個完事後「叫人搭的士定送埋人返屋企」的問題。薰姐，這是我們沒有想過的其他可能性啊！

我已把這個慣例 Save 在腦中了。就是明明要留人過夜，都要送落樓上一上車，然後出爾反爾再叫對方留低！

星期日，金金尿床。

下午，跟樹熊到九龍灣新開的 Megabox 商場走了一轉。

知道在德福有免費接駁巴士直達，可是在候車處一看，卻發現要等候最少一小時的時間。看了看地圖，知道是在以前工作的舊公司地址附近，徒步的路程也不過十五分鐘，於是二話不說，行過去。去到商場門口，要等。

從未試過去行商場，竟然實行人流管制每隔一段時間才放人入去。不過一場來到，無理由入都唔入就走架，等啦唯有。廿分鐘左右，入左商場，感覺上沒甚麼特別。來到商場大堂，竟然要排隊搭扶手電梯！看樣子，單是這樣排一排，可能也要半小時才掂到個電扶手。上到去唔知會唔會仲更加嚴峻？！

樹熊跟我互望了望，決定唔等，返德福打機好過。

結果，花了兩個小時左右，Mario Kart GP 1 和 2 的 150cc 所有關數、賽道，都通過了，簡單來說，爆曬機了。以後落機舖，真係唔知仲有咩好玩 ...

「我們都以為愛應該會永遠持續下去，其實不然。愛是流動的能量，隨它高興自由來去，有時候它會停留一輩子，有時候只會停留一秒、一天、一個月或一年。所以不要因為愛令你脆弱，而害怕它的到來；當它離開的時候也不必驚訝，你應該為自己曾經體驗過它而感到高興。」
─ 喬伊．克瑞墨（Joel Kramer）@ 《把妹達人》

書中提到，有一夜作者在一女生家中 ONS 之後失眠，隨手拿起女生床頭的一本小書，讀到這樣的一句話。一心上網搜尋過作者及書名，不果，相信這句話其實是作者自己杜撰的居多。

「人們常藉由閱讀尋找自己，並找出某個和他們有共鳴的人。」

一心在看愛情小說，又或是一些探討愛情、兩性話題的的文字佳作時，極容易會心情低落，變得多愁善感。那時，Ex 一見我在看愛情小說可樂了，知道我之後一兩個星期待她一定會變得溫柔細膩。我想，愛的確是一種流動的能量，而我補充能量的最有效方法，就是透過小說、書本，認真地去認識愛情的偉大和美麗。

於是近來，在看《The Game》期間，情緒的波動起落很大。寂寞過了頭，有時真的很想隨便找個人擁抱。可是，理智的那一端卻又再三告戒我：愛一個人的話，不要因為寂寞。有天晚上，跟車人說起，她說現在的我，是對「愛情」（的品質）的要求太高了。

 

「有些人一輩子都在試圖填滿他們靈魂的缺陷，當女人無法填補那些空虛的時候，他們轉向更偉大的東西：神。如果他們發現連神都無法撫平內心的空虛時，我很好奇他們該何去何從。」

也許是因為近來看相關題材的東西實在太多了。除了《The Game》外，又看了《冒牌伴郎生擒姊妹團 Wedding Crasher》、重看了一遍台灣 KUSO 新輕小說《正妹大學宅男社》；全都是講如何把妹、尋找真愛的東西 ...

我肯定，是時候要戒一戒這類書了，我沒有能力接三連三的接受這種思想上的衝擊。當一個人自以為自己很龐大 / 偉大，我們簡稱這是「自大」。自大就像一磚豆腐，經不起磨練和挑戰，一篤就散。我們男人的一生，信念就是這樣，不斷在女人、自己和神之間遊走。而現在，我的方向是趨向最前者。

一直覺得中文書名其實起得不太貼切，不過總算正正常常，起碼不是台灣常用的堆砌詞匯：如那些甚麼《把妹總動員》、《終極遊戲》之類，肯定更叫人受不了。有時又會奇想，如果此書是先在香港出中文版，也許書名會採用毫無創意的直譯：《遊戲：追女專家秘密會社起底 / 曝光 / 滲入》；又或者根據書中主角的經歷，便會變成《如何追到女明星》、《美女追求錦囊》、《追女天書》... 想到這裡，我想現時的書名雖然覺得未算最好，其實還不算差就是了。

近來養成了的習慣是，晚上看一兩個鐘頭的書、一邊看一邊健身做 Sit-up。感覺很好，生活好似過得好充實咁。

下一本書，我會看夏目漱石的《我是貓》，上星期在 Kubrick 買的。雖是不朽的日本文學，我想又不是三島由紀夫，應該不會睇到我更抑鬱吧？！