一心訴說感覺

 又係搬過來之前既事。話說當時研究點樣煲紅豆沙，初步有Ｄ成績。心思思，想整埋湯圓，咁就可以「紅豆沙湯圓」拿出來見人。

二話不說，整湯圓的最主要材料 ─ 糯米粉買左返來。不過個餡點整呢？就無定案。於是個湯圓就咁不了了之。

難得又有兩日中秋假，自己又一個孤家寡人咁留o係屋企，無理由唔搵Ｄ野俾自己做下，於是上網睇下人地點整，自己又跟住整。

o係可可夢的甜夢窩度 睇到，芝麻湯圓個餡材料主要係黑芝麻粉50g、糖30g同埋固體菜油25g。固體菜油（Vegetable Suet）在超級市場有售，一般放o係蛋糕材料的位置。芝麻粉就有Ｄ頭痕...結果我買左一盒芝麻糊沖劑（多多即溶芝麻糊，$8.4一盒200g分成4包 @ 百佳），諗住芝麻糊都係用芝麻粉整既o者！結果又俾我撞中左。^^

不過因為50g一包的芝麻糊粉本身有糖，所以我相對減少左糖的用量，加返多Ｄ菜油。結果黑芝麻粉：糖：固體菜油變成50g：15g：35g。搓均分成30個波波，放入雪櫃冰格雪硬。

30粒芝麻餡

湯圓皮的材料：
糯米粉　　　　　　　150g多少少
溫水　　　　　　　　半杯（125ml）多少少

以上既份量可以整到30粒湯圓。加水的竅門就係分幾次，每次加少少水就搓。基本份量就係150g粉 + 125ml水，不過因為粉團本身水份會慢慢乾，咁舊粉包包下Ｄ湯圓就會裂，所以要加返多少少水落去再搓下。

搓糯米粉比搓麵粉好既地方，係如果濕度適中既話，糯米粉團係唔黐手既^^

另外，搓好左既湯圓要再撲Ｄ乾粉，避免黐埋一齊，所以粉都要另外預多少少，我大概預多四個湯匙左右。

尋日咪話想整Pasta不過屋企無雞蛋既？今日出開超市買野，決定買雞蛋，死心不息要完了心願。

蒜蓉煙肉翠玉瓜Homemade Pasta

做Pasta份量的安排好容易，一百克麵粉加一隻中雞蛋就係一人份。如果人多既，按比例增加材料就好。不過我覺得最難既，都係舊粉搓均之後，要再用麵棍推翻薄佢。只係用一隻蛋來開麵粉，舊粉係好鬼實既。你又唔可以加水落去，只好每次都係用晒全身既力水去推薄佢啦。

推薄左之後，捲起佢先切會易搞Ｄ。就係咁自家製的Pasta就完成了。

淥意粉果陣，都係同平時差唔多做法，水滾落橄欖油同鹽，然後再落意粉。因為係新鮮意粉，時間上比乾粉淥少兩三分鐘左右。視乎自己喜好同埋等陣仲駛唔駛回鍋炒，自己因住時間就OK。

因為我只係求其咁在Supermart買左一包翠玉瓜，於是就求其咁滾刀切左，加蒜頭，雪櫃的急凍煙肉、同埋現成的蕃茄味意粉醬快炒，埋尾加Ｄ蓄芹香草，咁就解決左今晚果餐。

辛辛苦苦人手搓粉整意粉，不過就配現成意粉醬來煮，其實係咪有Ｄ少題大造，多此一舉？

捲起來切會易切Ｄ